ಕೀರ್ತನೆ ಹಾಡುವ ಮಹಿಳೆಯರ ಸಮಾನತೆಯ ಹಾಡು

“ಗುರುದ್ವಾರಗಳಲ್ಲಿ ಅವರು ಪ್ರದರ್ಶನ ನೀಡುವಾಗ ಅಲ್ಲಿನ ನಿರ್ವಾಹಕರು ಸ್ಪೀಕರ್‌ಗಳನ್ನು ಆಫ್‌ ಮಾಡುತ್ತಿದ್ದರು. ಅವರ ತಬಲಾಗಳನ್ನು ಗುರುದ್ವಾರದ ಹೊರಗೆ ಇಡಲಾಗುತ್ತಿತ್ತು ಎಂದು ಇಲ್ಲಿನ ಮಹಿಳೆಯರು ಹೇಳುತ್ತಿದ್ದರು,” ಎನ್ನುತ್ತಾರೆ ನರೀಂದರ್‌ ಕೌರ್.‌ ಅವರು ಕಳೆದ 41 ವರ್ಷಗಳಿಂದ ದೆಹಲಿಯಲ್ಲಿ ವಾಸಿಸುತ್ತಿದ್ದು. ಮೂಲತಃ ಗುರುದಾಸಪುರ ಜಿಲ್ಲೆಯ ಕಹ್ನುವಾನ್‌ ಎನ್ನುವ ಊರಿನವರು.

ನವದೆಹಲಿಯಲ್ಲಿ ಪ್ರಸಿದ್ಧ ಕೀರ್ತನಿಯಾ ಆಗಿರುವ ಅವರಿಗೆ ಪ್ರಸ್ತುತ 63 ವರ್ಷ. ಅವರು ಸಿಖ್ ಮಹಿಳೆಯರಿಗೆ ಪವಿತ್ರ ಗ್ರಂಥವಾದ ಗುರು ಗ್ರಂಥ ಸಾಹಿಬ್ ಪುಸ್ತಕವನ್ನು ಆಧರಿಸಿ ಧಾರ್ಮಿಕ ಸಂಗೀತ ಹಾಡುತ್ತಾರೆ ಮತ್ತು ತರಬೇತಿ ನೀಡುತ್ತಾರೆ. ಈ ಸಂಗೀತವನ್ನು ಶಬಾದ್ ಕೀರ್ತನೆಗಳು ಎಂದು ಕರೆಯಲಾಗುತ್ತದೆ. ಈ ಕೀರ್ತನೆಗಳನ್ನು ಗುರುದ್ವಾರಗಳಲ್ಲಿ ಮತ್ತು ಅದರ ಸುತ್ತಲಿನ ಪ್ರದೇಶಗಳಲ್ಲಿ ಹಾಡಲಾಗುತ್ತದೆ.

ಕೌರ್‌ ಅವರಿಗೆ ಈ ಕ್ಷೇತ್ರದಲ್ಲಿರುವ ಪರಿಣತಿಯ ಹೊರತಾಗಿಯೂ, ಇಲ್ಲಿರುವ ಇತರ ಹಾಡುಗಾರ ಮಹಿಳೆಯರಂತೆಯೇ ತಮ್ಮ ಕೌಶಲದಿಂದ ಗುರುತಿಸಿಕೊಳ್ಳಲು ಸಾಧ್ಯವಾಗುತ್ತಿಲ್ಲ. ಸಿಖ್‌ ಧಾರ್ಮಿಕ ಕ್ಷೇತ್ರಗಳಲ್ಲಿ ಮಹಿಳಾ ಹಾಡುಗಾರರನ್ನು ಈಗಲೂ ಗೌರವಯುತ ಸಂಗೀತಗಾರರನ್ನಾಗಿ ನೋಡಲು ಆ ಸಮಾಜ ಹಿಂಜರಿಯುತ್ತಿದೆ.

ದೆಹಲಿ ಸಿಖ್ ಗುರುದ್ವಾರ ನಿರ್ವಹಣಾ ಸಮಿತಿಯ 2022ರ ಡೈರೆಕ್ಟರಿಯಲ್ಲಿ ಸಮಿತಿಯು ನಿರ್ವಹಿಸುವ ಗುರುದ್ವಾರಗಳಲ್ಲಿ ಹಾಡುವ, ಸಂಗೀತ ವಾದ್ಯಗಳನ್ನು ನುಡಿಸುವ ಮತ್ತು ಪವಿತ್ರ ಗ್ರಂಥದಿಂದ ಸಾಲುಗಳನ್ನು ಪಠಿಸಲು ನೇಮಕಗೊಂಡವರನ್ನು ಪಟ್ಟಿ ಮಾಡುತ್ತದೆ. ನರೀಂದರ್ ಅವರ ಅನುಭವವಿ ಹಾಡುಗಾರರಿದ್ದರೂ, 62 ರಾಗಿ ಮತ್ತು ಧಾಡಿಗಳಲ್ಲಿ ಯಾವುದೇ ಮಹಿಳೆಯರನ್ನು ಗಾಯಕಿಯರೆಂದು ಪಟ್ಟಿ ಮಾಡಲಾಗಿಲ್ಲ; ಈ ವಿಷಯದಲ್ಲಿ ಕವಿಗಳ ಪರಿಸ್ಥಿತಿ ಒಂದಿಷ್ಟು ಉತ್ತಮವಾಗಿದೆ, 20ರಲ್ಲಿ ಎಂಟು ಹುದ್ದೆಗಳು ಮಹಿಳೆಯರಿಗೆ ಸೇರಿವೆ.

“ದೆಹಲಿಯ ಗುರುದ್ವಾರಗಳಲ್ಲಿ ಯಾವುದೇ ಪ್ರದರ್ಶನವನ್ನು ನೀಡಲು ನನಗೆ ಅನುಮತಿ ದೊರೆತು ಮುಂದಿನ ತಿಂಗಳಿಗೆ ಒಂದು ವರ್ಷವಾಗುತ್ತದೆ,” ಎಂದು 2022ರ ಆರಂಭದಲ್ಲಿ ನೇಮಕಗೊಂಡ ಕವಿ ಬೀಬಿ ರಾಜಿಂದರ್ ಕೌರ್ ಹೇಳುತ್ತಾರೆ.

ಎಡ: ನರೀಂದರ್ ಕೌರ್ ಕೀರ್ತನ್ ಸ್ಪರ್ಧೆಗಳಲ್ಲಿ ಪ್ರದರ್ಶನ ನೀಡಲು ಮಹಿಳೆಯರನ್ನು ಸಂಘಟಿಸುತ್ತಾರೆ. ಫೋಟೊ: ಹರ್ಮನ್ ಖುರಾನಾ ಬಲ: ನರೀಂದರ್ ಕೌರ್ ತನ್ನ ಜಾಥಾದ ಇತರ ಸದಸ್ಯರೊಂದಿಗೆ ದೆಹಲಿ ಫತೇಹ್ ದಿವಸ್ ಸಂದರ್ಭದಲ್ಲಿ ಪ್ರದರ್ಶನ ನೀಡುತ್ತಿರುವುದು. ಕೃಪೆ: ನರೀಂದರ್ ಕೌರ್

ಸಿಖ್ ಧರ್ಮದ ಅಧಿಕೃತ ನೀತಿಸಂಹಿತೆ ಮತ್ತು ಸಂಪ್ರದಾಯಗಳು – ಸಿಖ್ ರೆಹತ್ ಮರ್ಯಾದಾ – ಯಾವುದೇ ದೀಕ್ಷಾಸ್ನಾನ ಪಡೆದ ಸಿಖ್ ಸಮುದಾಯದ ವ್ಯಕ್ತಿ ಗುರುದ್ವಾರದೊಳಗೆ ಕೀರ್ತನೆ ಮಾಡಬಹುದು ಮತ್ತು ಅದಕ್ಕೆ ಲಿಂಗವು ಒಂದು ನಿರ್ಬಂಧವಲ್ಲ ಎಂದು ಹೇಳುತ್ತದೆ. ಐತಿಹಾಸಿಕ ಗುರುದ್ವಾರಗಳನ್ನು ನಿರ್ವಹಿಸುವ ಅತ್ಯುನ್ನತ ಪ್ರಾಧಿಕಾರವೆಂದು ಪರಿಗಣಿಸಲಾದ ಶಿರೋಮಣಿ ಗುರುದ್ವಾರ ಪ್ರಬಂಧಕ ಸಮಿತಿ (ಎಸ್‌ಜಿಪಿಸಿ) ಸಹ ಮಹಿಳೆಯರನ್ನು ಸೇರಿಸಿಕೊಳ್ಳಲು ಸಹಿ ಹಾಕಿದೆ. ಪಂಜಾಬ್, ಹರಿಯಾಣ, ಹಿಮಾಚಲ ಪ್ರದೇಶ ಮತ್ತು ಚಂಡೀಗಢದ ಗುರುದ್ವಾರಗಳಲ್ಲಿ ಅವರ ಆದೇಶವು ಪಾಲಿಸಲ್ಪಡುತ್ತದೆ.

ಅಂತಹ ಪ್ರಬಲ ಬೆಂಬಲದ ಹೊರತಾಗಿಯೂ, ಗುರುದ್ವಾರದಲ್ಲಿ ಮಹಿಳೆಯರಿಗೆ ಧಾರ್ಮಿಕ ಆಚರಣೆಗಳಿಗೆ ಅವಕಾಶ ನೀಡಬೇಕು ಎಂದು ಅನೇಕ ಸಿಖ್ಖರು ಒಪ್ಪುವುದಿಲ್ಲ, ಮತ್ತು ಇದರಿಂದಾಗಿ ಮಹಿಳಾ ಗಾಯಕಿಯರು ನಿರ್ಲಕ್ಷಿಸಲ್ಪಟ್ಟಿದ್ದಾರೆ.

ಲಿಂಗ ತಾರತಮ್ಯದ ವಿರುದ್ಧ ಮಾತನಾಡಿದ ಕೀರ್ತಂಕರ್ ಜಸ್ವಿಂದರ್ ಕೌರ್, “ಒಂದೇ ಆವರಣದಲ್ಲಿರುವ [ಇತರ] ಗುರುದ್ವಾರಗಳಲ್ಲಿ ಪ್ರದರ್ಶನ ನೀಡಲು ಸಮರ್ಥರಾದಾಗ, ಗೋಲ್ಡನ್ ಟೆಂಪಲ್‌ನ ಮುಖ್ಯ ಸಭಾಂಗಣದಲ್ಲಿ ನಿಷ್ಠಾವಂತ, ಶಿಸ್ತುಬದ್ಧ ಮತ್ತು ಸಂಗೀತ ತರಬೇತಿ ಪಡೆದ ಮಹಿಳೆಗೆ ಕೀರ್ತನೆಯನ್ನು ಪ್ರದರ್ಶಿಸಲು ಏಕೆ ಅನುಮತಿಸಲಾಗುವುದಿಲ್ಲ?” ಎಂದು ಪ್ರಶ್ನಿಸುತ್ತಾರೆ. 69 ವರ್ಷದ ಅವರು ನವದೆಹಲಿಯ ಮಾತಾ ಸುಂದರಿ ಕಾಲೇಜಿನಲ್ಲಿ ಗುರ್ಮತ್ ಸಂಗೀತದಲ್ಲಿ ಪ್ರಾಧ್ಯಾಪಕರಾಗಿದ್ದಾರೆ. ಅವರು ಗುರುಮತ್ ಸಂಗೀತದಲ್ಲಿ ವಿದ್ಯಾರ್ಥಿಗಳಿಗೆ ತರಬೇತಿ ನೀಡುತ್ತಾರೆ, ಇದು ಈ ಧರ್ಮದಷ್ಟೇ ಹಳೆಯ ಸಂಗೀತ ಸಂಪ್ರದಾಯವಾಗಿದೆ.

ಸಿಖ್ಖರ ಪವಿತ್ರ ಪೂಜಾ ಸ್ಥಳವಾದ ಗೋಲ್ಡನ್ ಟೆಂಪಲ್‌ನ ಅತ್ಯಂತ ಒಳಗಿನ ಗರ್ಭಗುಡಿಯ ಒಳಗೆ ಮಹಿಳೆಯರು ಹಾಡುವುದಿಲ್ಲ. ಎಸ್‌ಜಿಪಿಸಿ ಅಧ್ಯಕ್ಷೆಯಾಗಿ ಬೀಬಿ ಜಾಗೀರ್ ಕೌರ್ ಎಂಬ ಮಹಿಳೆಯನ್ನು ಹೊಂದಿದ್ದಾಗಲೂ ನಾಯಕರು ಈ ವಿಷಯದ ಬಗ್ಗೆ ಆಗಾಗ್ಗೆ ಮೌನವಾಗಿದ್ದರು. ಅವರು 2004-05ರಲ್ಲಿ ಈ ವಿಷಯವನ್ನು ಎತ್ತಿದರು ಮತ್ತು ಅವರು ಮಹಿಳೆಯರಿಗೆ ಕೀರ್ತನೆ ಮಾಡಲು ಆಹ್ವಾನ ನೀಡಿದರು ಎಂದು ಉಲ್ಲೇಖಿಸಲಾಗಿದೆ. ಅವರು ಸ್ವೀಕರಿಸಿದ ಯಾವುದೇ ಅರ್ಜಿಗಳು ಸಾಕಷ್ಟು ಉತ್ತಮವಾಗಿರಲಿಲ್ಲ ಮತ್ತು ಈ ಕಾರಣದಿಂದಾಗಿ ವಿಷಯವು ಅಲ್ಲಿಗೆ ಕೊನೆಗೊಂಡಿತು ಎಂದು ಅವರು ಹೇಳುತ್ತಾರೆ.

ಹತ್ತನೇ ಸಿಖ್ ಗುರುಗಳಾದ ಗುರು ಗೋವಿಂದ್ ಸಿಂಗ್ ಅವರು ಸ್ಥಾಪಿಸಿದ ಸಾಂಪ್ರದಾಯಿಕ ಸಿಖ್ ಸೆಮಿನರಿ ದಮ್ದಾಮಿ ತಕ್ಸಾಲ್ ಕೂಡ ಅವರ ಈ ಕ್ರಮವನ್ನು ವಿರೋಧಿಸಿತು. ಸಿಖ್ಖರಿಗೆ ಔಪಚಾರಿಕ ನೀತಿ ಸಂಹಿತೆಯನ್ನು ರೂಪಿಸಿದ ಮೊದಲ ಗುರುವೂ ಅವರು. ಸ್ವರ್ಣ ಮಂದಿರದೊಳಗೆ ಮಹಿಳೆಯರಿಗೆ ಹಾಡಲು ಅವಕಾಶ ನೀಡಿದರೆ, ಅದು ಗುರುಗಳ ಕಾಲದಿಂದಲೂ ಪುರುಷರಿಗೆ ಮಾತ್ರ ಹಾಡಲು ಅವಕಾಶ ನೀಡಿದ ಸಂಪ್ರದಾಯವನ್ನು ಅಗೌರವಿಸಿದಂತಾಗುತ್ತದೆ ಎಂದು ತಕ್ಸಲ್ ನಂಬುತ್ತದೆ.

ಇದನ್ನು ಬದಲಾಯಿಸಲು ಈ ಹಿಂದೆ ಅನೇಕ ಪ್ರಯತ್ನಗಳು ನಡೆದಿವೆ, ದೀಕ್ಷಾಸ್ನಾನ ಪಡೆದ ಸಿಖ್ ಮಹಿಳೆಯರಿಗೆ ಕೀರ್ತನೆ ಮಾಡುವ ಹಕ್ಕನ್ನು ನೀಡಲು 1940ರಲ್ಲಿ ಎಸ್‌ಜಿಪಿಸಿಯ ನಿರ್ಧಾರದಿಂದ ಆರಂಭಿಸಿ. 1996ರಲ್ಲಿ ಅಕಾಲ್ ತಖ್ತ್ ಅವರ ಇತ್ತೀಚಿನ ಹುಕುಮ್‌ನಾಮಾ (ಆಜ್ಞೆ)ಯಲ್ಲಿ ಇದನ್ನು ಪುನರುಚ್ಚರಿಸಲಾಯಿತು, ಆದರೆ ಲಿಂಗ ವಿಭಜನೆಯು ಮುಂದುವರಿದಿದೆ

ನವೆಂಬರ್ 2019ರಲ್ಲಿ, ಪಂಜಾಬ್ ವಿಧಾನಸಭೆ ಅಕಾಲ್ ತಖ್ತ್ (ಪ್ರಾಪಂಚಿಕ ಸಿಖ್ ಸಂಸ್ಥೆ) ಮತ್ತು ಎಸ್‌ಜಿಪಿಸಿಯನ್ನು ಗೋಲ್ಡನ್ ಟೆಂಪಲ್‌ನ ಅತ್ಯಂತ ಒಳಗಿನ ಗರ್ಭಗುಡಿಯೊಳಗೆ ಮಹಿಳೆಯರಿಗೆ ಕೀರ್ತನೆ ಮಾಡಲು ಅವಕಾಶ ನೀಡುವಂತೆ ವಿನಂತಿಸುವ ನಿರ್ಣಯವನ್ನು ಅಂಗೀಕರಿಸಿತು. ಇದನ್ನು ಅಂಗೀಕರಿಸುವ ಮೊದಲು ರಾಜ್ಯದ ಧಾರ್ಮಿಕ ಹಸ್ತಕ್ಷೇಪದ ಆಧಾರದ ಮೇಲೆ ಅದು ಅಸೆಂಬ್ಲಿಯ ಸದಸ್ಯರಿಂದ ಸಾಕಷ್ಟು ಪ್ರತಿರೋಧವನ್ನು ಎದುರಿಸಿತು.

ಮದುವೆಯಾಗುವ ಮೊದಲು, ಸಿಮ್ರಾನ್ ಕೌರ್ ತನ್ನ ಇತರ ಮಹಿಳಾ ಸೋದರಸಂಬಂಧಿಗಳೊಂದಿಗೆ ಹೋಶಿಯಾರ್‌ಪುರ ಜಿಲ್ಲೆಯ ಸೋಹಿಯಾನ್ ಗ್ರಾಮದ ಗುರುದ್ವಾರ ಗುರು ರವಿದಾಸ್ ಜೀ ಅವರೊಂದಿಗೆ ಒಂದು ಗಂಟೆ ಅಥವಾ ಅದಕ್ಕಿಂತ ಹೆಚ್ಚು ಕಾಲ ಕೀರ್ತನೆಗಳನ್ನು ಹಾಡುತ್ತಿದ್ದರು. 27ರ ಹರೆಯದ ಅವರು ಸ್ಥಳೀಯ ಸಣ್ಣ ಗುರುದ್ವಾರ ಸಂತ ಬಾಬಾ ಮೀಹಾನ್ ಸಿಂಗ್ ಜೀಗೆ ಪ್ರತಿದಿನ ಭೇಟಿ ನೀಡುತ್ತಿದ್ದರು. ಅಲ್ಲಿ ಹೆಂಗಸರು ಹಾಡುವುದನ್ನು ಗಮನಿಸಿದರು ಮತ್ತು ಅಲ್ಲಿ ಅದನ್ನು ಅಸಾಮಾನ್ಯವೆಂದು ಪರಿಗಣಿಸಲಾಗಿರಲಿಲ್ಲ. ಸಣ್ಣ ಗುರುದ್ವಾರಗಳು ಎಸ್‌ಜಿಪಿಸಿಗೆ ಸಂಬಂಧಿಸಿಲ್ಲ ಹೀಗಾಗಿ ಅಲ್ಲಿನ ನಿಯಮಗಳು ಅಷ್ಟು ಕಠಿಣವಾಗಿಲ್ಲ ಎಂದು ಅವರು ಭಾವಿಸುತ್ತಾರೆ.

“ಹಳ್ಳಿಗಳಲ್ಲಿ, ಹೆಚ್ಚಾಗಿ ಮಹಿಳೆಯರು ಗುರುದ್ವಾರವನ್ನು ನಿರ್ವಹಿಸುತ್ತಾರೆ. ಪುರುಷರು ಸಾಮಾನ್ಯವಾಗಿ ಬೆಳಿಗ್ಗೆ ಕೆಲಸಕ್ಕೆ ಹೊರಡುತ್ತಾರೆ. ಯಾರು ಮೊದಲು ಗುರುದ್ವಾರವನ್ನು ತಲುಪುತ್ತಾರೋ ಅವರು ಅಭ್ಯಾಸವನ್ನು ಪ್ರಾರಂಭಿಸುತ್ತಾರೆ,” ಎಂದು ಸಿಮ್ರಾನ್ ಹೇಳುತ್ತಾರೆ.

ಎಲ್ಲಾ ಹಳ್ಳಿಗಳಲ್ಲಿ ಇದು ಸಾಧ್ಯವಾಗದಿರಬಹುದು ಆದರೆ ಹರ್ಮನ್ಪ್ರೀತ್ ಕೌರ್ ಅವರ ಅನುಭವವು ತೋರಿಸುವಂತೆ ವಿಷಯಗಳು ಬದಲಾಗುತ್ತಿವೆ. 19 ವರ್ಷದ ಯುವತಿ ತಾರ್ನ್ ತರಣ್ ಜಿಲ್ಲೆಯ ಪ್ಯಾಟಿಯ ಯುವ ಕೀರ್ತನ್‌ಕಾರ್ ಆಗಿದ್ದು, ತನ್ನ ಸ್ಥಳೀಯ ಗುರುದ್ವಾರವಾದ ಬೀಬಿ ರಜನಿ ಜೀಯಲ್ಲಿ ಮಹಿಳೆಯರು ಪ್ರದರ್ಶನ ನೀಡುವುದನ್ನು ತಾನು ನೋಡಿಲ್ಲ ಎಂದು ಅವರು ಹೇಳುತ್ತಾರೆ. ಗುರುದ್ವಾರದಲ್ಲಿ ಸಾರ್ವಜನಿಕ ಪೂಜೆಯ ಸಮಯದಲ್ಲಿ ಗುರು ಗ್ರಂಥ ಸಾಹಿಬ್ ಓದುವ ಅವರ ತಂದೆ, ಅವರನ್ನು ಕೀರ್ತನೆಗೆ ಪರಿಚಯಿಸಿದರು. ಅವರು ಈಗ ಅಲ್ಲಿ ವಿಶೇಷ ಸಂದರ್ಭಗಳಲ್ಲಿ ಪ್ರದರ್ಶನ ನೀಡುತ್ತಾರೆ.

ಎಡ: ಸಿಮ್ರಾನ್ ಕೌರ್ ಅವರ ಚಿಕ್ಕಮ್ಮ 2006ರಲ್ಲಿ ಗುರು ರವಿದಾಸ್ ಅವರ ಹುಟ್ಟುಹಬ್ಬದ ಸಂದರ್ಭದಲ್ಲಿ ತನ್ನ ಮಗಳೊಂದಿಗೆ ಕೀರ್ತನೆ ಹಾಡಿದರು. ಕೃಪೆ: ಜಸ್ವಿಂದರ್ ಕೌರ್. ಬಲ: ಸಿಮ್ರಾನ್ ಅವರ ಕೀರ್ತನ್ ಅಭ್ಯಾಸವು ಅವರು ಮದುವೆಯಾದ ನಂತರ ಸ್ಥಗಿತಗೊಂಡಿತು, ಆದರೆ ಅವರು ಹತ್ತಿರದ ಗುರುದ್ವಾರದಲ್ಲಿ ತನ್ನ ಅಭ್ಯಾಸವನ್ನು ಪುನರಾರಂಭಿಸಲು ಯೋಚಿಸುತ್ತಿದ್ದಾರೆ. ಫೋಟೋ: ಜಸ್ವಿಂದರ್ ಕೌರ್

100 ಕಿಲೋಮೀಟರ್ ದೂರದಲ್ಲಿರುವ ಪಠಾಣಕೋಟ್ ನಗರದ 54 ವರ್ಷದ ದಿಲ್ಬಾಗ್ ಸಿಂಗ್, ನಗರದ ಮಹಿಳೆಯರು ಪ್ರತಿ ಶನಿವಾರ ಇಲ್ಲಿನ ಗುರುದ್ವಾರ ಗುರು ಸಿಂಗ್ ಸಭಾದಲ್ಲಿ ಕೆಲವು ಗಂಟೆಗಳ ಕಾಲ ಕೀರ್ತನೆ ಮತ್ತು ಪ್ರಾರ್ಥನೆಯನ್ನು ಮಾಡುತ್ತಾರೆ ಎಂದು ಹೇಳುತ್ತಾರೆ. ಅವರು ಪ್ರದರ್ಶನ ನೀಡಲು ಉತ್ಸವಗಳಿಗೆ ಭೇಟಿ ನೀಡುವ ಮಹಿಳಾ ನೇತೃತ್ವದ ಖಾಸಗಿ ಸಂಗೀತ ಗುಂಪುಗಳನ್ನು ಸಹ ಹೊಂದಿದ್ದಾರೆ.

25 ವರ್ಷದ ಸುಖ್ ದೀಪ್ ಕೌರ್ ಪಟಿಯಾಲದ ಪಂಜಾಬಿ ವಿಶ್ವವಿದ್ಯಾಲಯದಿಂದ ಸಿಖ್ ಸ್ಟಡೀಸ್ ಮತ್ತು ರಿಲಿಜಿಯಸ್ ಸ್ಟಡೀಸ್ ವಿಷಯದಲ್ಲಿ ಡಬಲ್ ಮಾಸ್ಟರ್ಸ್ ಪಡೆದಿದ್ದಾರೆ. ಅವರು ಪ್ರಸ್ತುತ ಪಂಜಾಬಿನ ಸಂಗ್ರೂರ್ ಜಿಲ್ಲೆಯ ಲಸೋಯ್ ಗ್ರಾಮದಲ್ಲಿ ವಾಸಿಸುತ್ತಿದ್ದಾರೆ ಮತ್ತು ಲಿಂಗ ಶ್ರೇಣಿಗೆ ಪುರುಷರನ್ನು ದೂಷಿಸುವುದು ಅನ್ಯಾಯ ಎಂದು ಭಾವಿಸುತ್ತಾರೆ. ಗುರುದ್ವಾರದಲ್ಲಿ ಪೂರ್ಣ ಸಮಯದ ಪಾತ್ರಗಳನ್ನು ತೆಗೆದುಕೊಳ್ಳುವುದು ಮಹಿಳೆಯರಿಗೆ ಕಷ್ಟಕರವಾಗುತ್ತದೆ ಮತ್ತು ಒಬ್ಬ ಮಹಿಳೆ “ಪ್ರಾರ್ಥನೆಗಳನ್ನು ಹಾಡುವುದಕ್ಕಿಂತ ಹೆಚ್ಚಾಗಿ ತನ್ನ ಮಕ್ಕಳು ಮತ್ತು ಕುಟುಂಬವನ್ನು ನಿರ್ವಹಿಸುತ್ತಾಳೆ,” ಎಂದು ಅವರು ಭಾವಿಸುತ್ತಾರೆ.

ನರೀಂದರ್ ಕೌರ್ ಮಹಿಳೆಯರು ಎಲ್ಲವನ್ನೂ ನಿರ್ವಹಿಸಬಲ್ಲರು ಎಂದು ನಂಬುತ್ತಾರೆ. 2012ರಲ್ಲಿ, ಅವರು ಗುರ್ಬಾನಿ ವಿರ್ಸಾ ಸಂಭಾಲ್ ಸತ್ಸಂಗ್ ಜಾಥಾವನ್ನು ಪ್ರಾರಂಭಿಸಿದರು, ಅವರು ಕೆಲವು ಗಂಟೆಗಳನ್ನು ಅಭ್ಯಾಸಕ್ಕಾಗಿ ಮೀಸಲಿಡಬಲ್ಲರು ಮತ್ತು ಗುರುದ್ವಾರಗಳಲ್ಲಿ ಪ್ರದರ್ಶನ ನೀಡಲು ಉತ್ಸುಕರಾಗಿದ್ದರು. “ಅವರು ತಮ್ಮ ಮಕ್ಕಳು ಮತ್ತು ಕುಟುಂಬಗಳನ್ನು ನಿರ್ವಹಿಸುತ್ತಾರೆ. ಅವರ ಸೇವೆ [ಸೇವೆ] ಸಿಂಗ್ [ಪುರುಷ ಸಿಖ್] ಗಿಂತ ದುಪ್ಪಟ್ಟಾಗಿದೆ,” ಎಂದು ಅವರು ಹೇಳುತ್ತಾರೆ.

ಸಿಖ್ ಅಲ್ಪಸಂಖ್ಯಾತ ಕಾಲೇಜುಗಳಲ್ಲಿನ ದೈವಿಕ ಸಮಾಜಗಳು ಗುರ್ಮತ್ ಸಂಗೀತದಲ್ಲಿ ತರಬೇತಿ ಪಡೆಯಲು ಸಿಖ್ ವಿದ್ಯಾರ್ಥಿಗಳಿಗೆ ತರಬೇತಿ ನೀಡುವ ಮೈದಾನಗಳಾಗಿವೆ. ಈಗ ಕೃಪಾ ಕೌರ್ ಎಂಬ ಹೆಸರಿನಿಂದ ಕರೆಯಲ್ಪಡುವ ಕಾಜಲ್ ಚಾವ್ಲಾ, ದೆಹಲಿ ವಿಶ್ವವಿದ್ಯಾಲಯದ ಗುರು ಗೋವಿಂದ್ ಸಿಂಗ್ ಕಾಲೇಜಿನಿಂದ 2018ರಲ್ಲಿ ಅರ್ಥಶಾಸ್ತ್ರ ಆನರ್ಸ್‌ ವಿಷಯದಲ್ಲಿ ಪದವಿ ಪಡೆದರು. ಕಾಲೇಜಿನಲ್ಲಿ ಓದುತ್ತಿದ್ದಾಗ, 24 ವರ್ಷದ ಅವರು ಕಾಲೇಜು ದೈವತ್ವ ಸೊಸೈಟಿಯಾದ ವಿಸ್ಮಾದ್ ಸಂಸ್ಥೆಯ ಸಕ್ರಿಯ ಸದಸ್ಯರಾಗಿದ್ದರು. ಅವರು ಸಮಾಜದೊಂದಿಗೆ ಸಂಬಂಧವನ್ನು ಮುಂದುವರೆಸಿದ್ದಾರೆ ಮತ್ತು ಅವರು ಹೇಳುವಂತೆ, “ನಮ್ಮ ಸದಸ್ಯರು ಎಲ್ಲಾ ರೀತಿಯ ಹಿನ್ನೆಲೆಗಳಿಂದ ಬಂದವರು ಮತ್ತು ಅವರನ್ನು ಸಂಸ್ಥೆ ಕೀರ್ತನೆ, ಕವನ ಮತ್ತು ಡಿಕ್ಲಮೇಶನ್ ಸ್ಪರ್ಧೆಗಳಿಗೆ ಸಜ್ಜುಗೊಳಿಸುತ್ತದೆ. ಕಾಲೇಜು ಉತ್ಸವಗಳು ನಮ್ಮನ್ನು ಸಿದ್ಧಗೊಳಿಸುತ್ತವೆ ಮತ್ತು ಆತ್ಮವಿಶ್ವಾಸವನ್ನು ಹೆಚ್ಚಿಸುತ್ತವೆ.”

“ಜೋ ಜ್ಯಾದಾ ರಿಯಾಜ್ ಕರೇಗಾ ವೋ ರಾಜ್ ಕರೇಗಾ [ಯಾರು ಹೆಚ್ಚು ಅಭ್ಯಾಸ ಮಾಡುತ್ತಾರೋ ಅವರು ವೇದಿಕೆಯನ್ನು ಆಳುತ್ತಾರೆ],” ಎಂದು ದೆಹಲಿ ವಿಶ್ವವಿದ್ಯಾಲಯದ ಎಸ್ಜಿಟಿಬಿ ಖಾಲ್ಸಾ ಕಾಲೇಜಿನಲ್ಲಿ ದೈವತ್ವ ಸಮಾಜಕ್ಕಾಗಿ ತಬಲಾ ನುಡಿಸುವ 24 ವರ್ಷದ ಬಕ್ಷಂದ್ ಸಿಂಗ್ ಹೇಳುತ್ತಾರೆ. ಇಲ್ಲಿಂದ ವಿದ್ಯಾರ್ಥಿಗಳು ದೆಹಲಿಯಾದ್ಯಂತ ಗುರುದ್ವಾರಗಳು ಮತ್ತು ಕಾರ್ಯಕ್ರಮಗಳಲ್ಲಿ ಪ್ರದರ್ಶನ ನೀಡುತ್ತಾರೆ ಮತ್ತು ಇತರ ರಾಜ್ಯಗಳಿಗೆ ಪ್ರವಾಸಕ್ಕೆ ಹೋಗುತ್ತಾರೆ.

ಆದರೆ ಯುವ ಸಿಖ್ಖರ ಉತ್ಸಾಹವು ಅವರಿಗೆ ಉತ್ತಮ ಸ್ಥಾನ ಮತ್ತು ಮನ್ನಣೆಯಾಗಿ ರೂಪಾಂತರಗೊಳ್ಳುತ್ತಿಲ್ಲ. “ಗುರುದ್ವಾರಗಳಲ್ಲಿ ಅನೇಕ ಮಹಿಳೆಯರು ಕೀರ್ತನೆಗಳನ್ನು ಪ್ರದರ್ಶಿಸಿದರೂ, ರಾಗಿ ಅಥವಾ ಗ್ರಂಥಿಯಾಗಿ ನೇಮಕಗೊಂಡ ಮಹಿಳೆಯನ್ನು ನಾನು ನೋಡಿಲ್ಲ,” ಎಂದು ದೆಹಲಿ ಸಿಖ್ ಗುರುದ್ವಾರ ನಿರ್ವಹಣಾ ಸಮಿತಿಯ (ಡಿಎಸ್‌ಜಿಎಂಸಿ) ಮಾಜಿ ಸದಸ್ಯ 54 ವರ್ಷದ ಚಮನ್ ಸಿಂಗ್ ಹೇಳುತ್ತಾರೆ. ಗುಮಾಸ್ತ ಮತ್ತು ಅಕೌಂಟಿಂಗ್ ಕೆಲಸಗಳಲ್ಲಿ ಅಥವಾ ಲಂಗರ್‌ನಲ್ಲಿ ಊಟವನ್ನು ತಯಾರಿಸಲು ಮಹಿಳೆಯರನ್ನು ನೇಮಿಸಿಕೊಳ್ಳಲಾಗಿದೆ ಎಂದು ಅವರು ಹೇಳುತ್ತಾರೆ. ಕೀರ್ತನೆಗಾರರ ವೇತನವು ತಿಂಗಳಿಗೆ 9,000 ರೂ.ಗಳಿಂದ 16,000 ರೂ.ಗಳವರೆಗೆ ಇರುತ್ತದೆ.

“ಅಧಿಕಾರವು ಗುರುದ್ವಾರಗಳ ನಿರ್ವಹಣಾ ಸಮಿತಿಗಳಿಗೆ ಸೇರಿದೆ. ಅವರು ಗುರುಪುರಬ್ (ಹಬ್ಬ) ಅಥವಾ ಸಮಾಗಮವನ್ನು (ಖಾಸಗಿ ಧಾರ್ಮಿಕ ಕಾರ್ಯಕ್ರಮ) ಆಯೋಜಿಸುವಾಗ, ಅವರು ಈಗಲೂ ಯುವ ವಿದ್ಯಾರ್ಥಿಗಳು ಮತ್ತು ಮಹಿಳೆಯರಿಗೆ ಪ್ರದರ್ಶನ ನೀಡಲು ಪ್ರೋತ್ಸಾಹಿಸುವ ಬದಲು ಸ್ಥಾಪಿಸಿದ ರಾಗಿಗಳನ್ನು ಏಕೆ ಬಯಸುತ್ತಾರೆ?” ಎಂದು ದೆಹಲಿಯ ಪರಮ್ಪ್ರೀತ್ ಕೌರ್ ಪ್ರಶ್ನಿಸುತ್ತಾರೆ.

32 ವರ್ಷದ ಅವರು ಹಿಂದೂಸ್ತಾನಿ ಸಂಗೀತದಲ್ಲಿ ತರಬೇತಿ ಪಡೆದಿದ್ದಾರೆ ಮತ್ತು ಪಟಿಯಾಲದ ಪಂಜಾಬಿ ವಿಶ್ವವಿದ್ಯಾಲಯದಿಂದ ಗುರ್ಮತ್ ಸಂಗೀತದಲ್ಲಿ ಎಂಎ ಪಡೆದಿದ್ದಾರೆ. ಇತರ ಯುವತಿಯರ ಧ್ವನಿಗಳಂತೆ, ಅವರ ಧ್ವನಿಯೂ ನೆಲೆಯೂರುತ್ತಿದೆ ಮತ್ತು ಗುರುದ್ವಾರಗಳ ಮುಂದೆ, ಯಾವುದೇ ಅಪವಾದವಿಲ್ಲದೆ, ಮಹಿಳೆಯರ ಧ್ವನಿಗಳನ್ನು ಅವರ ಪ್ರಾರ್ಥನಾ ಸ್ಥಳಗಳ ಮೂಲಕ ಪ್ರತಿಧ್ವನಿಸಲು ಅನುವು ಮಾಡಿಕೊಡುವುದು ಕೇವಲ ಕಾಲ ನಿರ್ಧರಿಸಬಹುದಾದ ವಿಷಯವಾಗಿದೆ ಎಂದು ತೋರುತ್ತದೆ.

ਭੰਡਹੁ ਹੀ ਭੰਡੁ ਊਪਜੈ ਭੰਡੈ ਬਾਝੁ ਨ ਕੋਇ ॥

ਨਾਨਕ ਭੰਡੈ ਬਾਹਰਾ ਏਕੋ ਸਚਾ ਸੋਇ ॥

ಒಬ್ಬ ಹೆಣ್ಣಿನಿಂದ ಇನ್ನೋರ್ವ ಹೆಣ್ಣು ಹುಟ್ಟುತ್ತಾಳೆ;

ಹೆಣ್ಣಿಲ್ಲದೆ ಹೋಗಿದ್ದರೆ, ಯಾರೂ ಇರುತ್ತಿರಲಿಲ್ಲ.

ಈ ಶ್ಲೋಕವನ್ನು ರಾಗ ಆಸಾದಲ್ಲಿ ಹಾಡಲಾದ ಗುರು ಗ್ರಂಥ ಸಾಹಿಬ್ ನ ಮೀಲಾ 1ರಿಂದ ಆಯ್ದುಕೊಳ್ಳಲಾಗಿದೆ.

ಪರಿ ಮುಖಪುಟಕ್ಕೆ ಮರಳಲು, ಇಲ್ಲಿ ಕ್ಲಿಕ್ ಮಾಡಿ.